قطار الساعة ٦:١٠ صباحًا متجهًا إلى أبو صوير

أسوأ يوم وأسوأ لحظات بتعدي عليا هي لحظات اليوم اللي قبل الجيش وطريق السفر والتفكير في سنين العمر الضائعة في اللا شئ، القلب مقبوض والفكرُ مشغول وشارد في آلاف الأفكار في نفس الوقت.

أريد أن اتعلم اللا مبالاة؛ كي اتحمل كل هذه المدّة التي أجبرت عليها، شعور بشع وقاتل حين تُجبر أن تفعل شئ لا تقبله!

ربي إني استعوضتك هذه الأيام فأجعل بها الفائدة والنفع وإجعلها يا ربي أيامٌ لي وليس عليّ، اللهم إني استودعك أهلي ومالي في كل سفر، اللهم هوّن عليّ في كل سفر، أعوذ بك ربي من كآبة المنظر وسوء المنقلب في المال والأهل!

اللهم قد شكوت لك بثي وحُزني.

غربة النفس وقت المحن

وقد عاد الفتى كما كان، لم تخضعه الظروف والبيئة التي تحاصره، قد عاد يسير على الأمور لصالحه بأمر الله وبمشيئته؛ فهو عونه وحسبه ونعم الوكيل.

جعلته التجربة يدرك أنه يستطيع التأقلم في أي ظروف، مهما بلغت من قسوة وتحجيم، يستطيع أن يتفهم كيف تسير الأمور ويطوع قدراته وخبراته القديمة في استغلال ثغرات النظم التي تحكم.

عاد الفتى لا مبالي غير مكترث ولا يخاف أي شئ، ولا يرتجف قلبه إلا بين يدي الله، بعد أن تاه بين ثنايا التقصير (المكره عليه) مع الله، قد أبى الله أن يفقد عبده وأبى العبد أن يفقد ربه.

قد استجاب الله لدعاءه الذي كان يبكي(أحيانا كثيرة) وهو يتضرع ويشكو إلى الله به:
اللهم إني أعوذ بك من الهم والحزن والعجز والكسل والبخل والجبن وغلبة الدين وقهر الرجال.
كان قلبه يرتجف وهو يناجي الله داعيا به، ويرتجف كلما شعر باستجابة الله له بتنجيته من المحن التي يتعرض لها. هو الله يكفيه حسبه ونعم الوكيل، لا إله إلا أنت سبحانك إني كنت من الظالمين، سبحانك الله وبحمدك سبحانك الله العظيم.

يوم يسأل الأب عن ابنه 1

المفروض الأهل زي ما بيجيبوا لأبنائهم مدرسين يعلموهم المواد الدراسية، يجيبولهم حد يعلمهم إزاي يتكلموا وإزاي يعبروا عن اللي بيحسوا بيه وبيفكروا فيه!
؛ لأن فعلا فيه أولاد وبنات مش بيعرفوا يعبروا عن اللي بيحسوا بيه واللي بيفكروا فيه وبيكبروا على ده وبينطووا على أنفسهم وبيتقوقعوا وبيجيلهم مشاكل نفسيا!

رُوِي عن النّبي -عليه الصّلاة والسّلام- أنّه قال: (ما نحل والدٌ ولدًا مِن نحْلٍ أفضلَ من أدبٍ حسنٍ)، رواه الترمزي وقال ابن عمر رضي الله عنه: (أدِّب ابنك فإنّك مسؤول عنه: ماذا أدّبته، وماذا عَلَّمته؟ وهو مسؤول عن بِرِّك وطواعيته لك)، كما ذكر بعض العلماء أنّ الله سبحانه وتعالى يسأل الأب عن ابنه يوم القيامة قبل أن يسأل الابن عن أبيه، ومن المعلوم للعموم بالدّلائل والبراهين والوقائع الثّابتة أنّه ما أفسد الأبناء مثل إهمال الآباء في تأديبهم وتعليمهم.

هات إبنك وقوله قولي رأيك في أي مشكلة مثلا يشوفها وسيبه يتكلم وإسمعه، أو خليه يعبر عن وجهة نظره في موضوع ما معاصر، علي ذوقه الأدبي، مع الوقت هياخد جرأة الكلام وهيبقى له رأي وفكر مش مجرد تابع!

افتكروا إن ده حقهم عليكم 

إلا من أتى الله بقلب سليم

الشيطان هدفه الوحيد بل الأوحد هو إنه يوصل لقلوبنا ويفسدها، فإذا فسد القلب فسد العقل

{أَفَلَمْ يَسِيرُوا فِي الْأَرْضِ فَتَكُونَ لَهُمْ قُلُوبٌ يَعْقِلُونَ بِهَا أَوْ آذَانٌ يَسْمَعُونَ بِهَا ۖ فَإِنَّهَا لَا تَعْمَى الْأَبْصَارُ وَلَٰكِن تَعْمَى الْقُلُوبُ الَّتِي فِي الصُّدُورِ (الحج 46)}

وتهيأت الظروف للإنسان لأن يعصى ربه بالفساد في الأرض(بكل صور الفساد بقى حتى الفساد الفكري ونشر الفكر المفسد)،

لذلك يكون ميزان الإنسان عند الله يوم القيامة القلب {إِلَّا مَنْ أَتَى اللَّهَ بِقَلْبٍ سَلِيمٍ (الشعراء 89)}.

عن أبي هريرة - رضي الله عنه - أن رسول الله - صلى الله عليه وسلم - قال:
((إنه ليأتي الرجل العظيم السمين يوم القيامة لا يزن عند الله جناح بعوضة))،
وقال: ((اقرؤوا: ﴿ فَلَا نُقِيمُ لَهُمْ يَوْمَ الْقِيَامَةِ وَزْنًا ﴾ [الكهف: 105]))؛ متفق عليه.

اللهم سلم قلوبنا وإحفظها لنا من كيد الشياطين(من الإنس والجن).

بينما أنت تلهو أحدهم يصنع مجدا

الجملتين دول أصبحوا تريند بقالهم فترة ليست بقليلة, لكن حاسس الناس بتستخدمهم في غير موضعهم؛ فقررت استخدمهم في موضعهم : )

" هذا هو اللهو الحقيقي؛ وهذا هو المجد الحقيقي. "

الغيبة الإلكترونية على جروبات الفيسبوك

اتعجب من ناس بتحاول تظهر نفسها ثورية وصاحبة أفكار بناءة ومش عاجبها حال البلد، وبينتقدوا تصرفات الناس التانية وهما بيعملوا أحقر الأفعال فيما بينهم.

فيه ناس بتغتاب ناس في ظهرها وعاملين جروبات بيؤدوا فيها الطقوس دي وبيسموا ده " سف وتحفيل " وده طبيعي أكيد مش هيسموها بإسمها ولا حتى هيفكروا في لحظة إنها غلط أو لأ(بعيدا عن إنها تفاهة وسخافة وشئ مش بيدر عليهم بمنفعة).

واحد يطلع يقولك يا عم دي غيبة إلكترونية إيه علاقتها بالغيبة اللي الناس بتتكلم فيها على بعض في ظهرها؟ طبعا ده مفيش رد عليه غير إنك تقوله إتق الله وأقعد مع نفسك وفكر بهدوء هل دي غيبة ولا لأ.

روى مسلم في صحيحه مِن حَدِيثِ أَبِي هُرَيرَةَ رضي اللهُ عنه: أَنَّ رَسُولَ اللهِ صلى اللهُ عليه وسلم قَالَ: "أَتَدْرُونَ مَا الْغِيبَةُ؟ قَالُوا: اللهُ وَرَسُولُهُ أَعْلَمُ، قَالَ: ذِكْرُكَ أَخَاكَ بِمَا يَكْرَهُ، قِيلَ: أَفَرَأَيْتَ إِنْ كَانَ فِي أَخِي مَا أَقُولُ؟ قَالَ: إِنْ كَانَ فِيهِ مَا تَقُولُ فَقَدِ اغْتَبْتَهُ، وَإِنْ لَمْ يَكُنْ فِيهِ فَقَدْ بَهَتَّهُ".

والذي لا يعلم معنى الغيبة وما يندرج تحتها فقد قال التهانوي:

"الغيبة: أن تذكر أخاك بما يكرهه لو بلغه سواء ذكرت نقصانًا في بدنه، أو في لبسه، أو في خلقه، أو في فعله، أو في قوله، أو في دينه، أو في دنياه، أو في ولده، أو في ثوبه، أو في داره، أو في دابته، قال: ولا تقتصر الغيبة على القول، بل تجري أيضًا في الفعل كالحركة والإشارة والكتابة".

هل كنت تعلم أن الغيبة تشمل كل هذا؟ وإحنا بنستهون بكل هذا وندعي الطهر والعفاف والتبرأ من كل الخطايا في كلامنا وجملنا.

وما يخفى علينا عذاب المغتابين يوم القيامة ودقة وصف النبي له مما ورد في مسند الإمام أحمد مِن حَدِيثِ أَنَسِ بنِ مَالِكٍ رضي اللهُ عنه: أَنَّ النَّبِيَّ صلى اللهُ عليه وسلم قَالَ: "لَمَّا عَرَجَ بِي رَبِّي مَرَرْتُ بِقَوْمٍ لَهُمْ أَظْفَارٌ مِنْ نُحَاسٍ يَخْمُشُونَ وُجُوهَهُمْ وَصُدُورَهُمْ، فَقُلْتُ: مَنْ هَؤُلَاءِ يَا جِبْرِيلُ؟ قَالَ: هَؤُلَاءِ الَّذِينَ يَأْكُلُونَ لُحُومَ النَّاسِ، وَيَقَعُونَ فِي أَعْرَاضِهِمْ"

ربنا يهدينا جميعا ويرحمنا من شرور أنفسنا وأنفس الناس.

إشكالية اللغة العربية في تطبيقاتي

فيه ناس مش بتحب(وأحيانا بأحس إنها مش بتستنضف) التطبيقات ذات واجهة مستخدم عربية، تطبيقات عربية من الآخر، حتى ولو كانت تؤدي الغاية على أكمل وجه، ولا أدري لماذا!!

عموما لكل من يسأل لماذا أقوم بنشر تطبيقاتي باللغة العربية أولا؛ فببساطة أنا بأعمل التطبيقات عشان أنا استخدمها أولا، وثانيا حتى أساهم(ولو بفتات الفتات) في زيادة المحتوى العربي على الإنترنت!! وده برضة بيفسر فيديوهاتي التعليمية اللي كنت بأعملها بالعربي على قناتي على يوتيوب!

وحاليا حتى أكسب الجميع(وإن كان هدفي الأكبر هو العرب فقط)، أي تطبيق هأنزله، هيكون فيه نسخة أساسية باللغة العربية، ونسخة أخرى باللغات الأخرى، أو سأجمع كل اللغات في نفس النسخة على أن يكون هناك اختيارات تتيح تغيير اللغة بإذن الله!

لينك تطبيقاتي على جوجل بلاي ستور:
https://play.google.com/store/apps/developer?id=Mostafa+Saady

المجاهرة بالمعصية ضد التوبة ومواجهة المجتمع

أنا مش هاتكلم كتير بشكل إنشائي دراماتيكي بعد ما هي بذات نفسها نزلت الكلام ده؛ ومش هاتكلم من منظور الأخلاق وجميع الأديان لأني ذكرت ده في كلام السابق، أنا هاتكلم من منظور الدين اللي بأؤمن بيه:

هذه كتلة صارخة من التبرير ومحاولة تلوين حقيقة غلط؛ بتعطي تبريرات كمان للناس إنها تعمل الغلط، يعني مش هنكتفي بإن الموضوع خلص وعدى وهيتنسي لأ كمان بندي مبررات وجمل إنشائية مهترأة تهز كل نفس مكسورة في هذا البلد اللي بيعاني من مشاكل كتير وتخليه يفكر في الغلط.. بدل ما نحترم نفسنا ونسكت وربنا يغفرلنا؛ لأ إحنا نجاهر بالمعصية كمان!!

المجاهرة بالمعصية ده شئ كبير جدا جدا بيترتب عليه مفاسد كثيرة أعظم منه وهي نفس اللي ذكرتها في المنشور السابق.
ربنا تعالى بيقول في سورة النساء الآية 148:
﴿ لا يُحِبُّ اللَّهُ الْجَهْرَ بِالسُّوءِ مِنَ الْقَوْلِ إِلاَّ مَنْ ظُلِمَ وَكَانَ اللَّهُ سَمِيعًا عَلِيمًا ﴾

" لا يحب " ربنا مش بيحب الجهر بالسوء إلا من ظلم؟ يا رب نكون مدركين معنى إن ربنا مش بيحب حاجة وإحنا نعملها!

في الصحيحين البخاري ومسلم: من حديث سالم بن عبدالله، قال: سمعت رسول الله - صلَّى الله عليه وسلَّم - يقول: ((كلُّ أُمَّتي معافًى إلا المجاهرين، وإنَّ من المجاهرة أن يعمل الرَّجلُ بالليل عملاً، ثم يصبح وقد ستره الله عليه، فيقول: يا فلان، عملتُ البارحة كذا وكذا، وقد بات يستره ربُّه، ويُصبِح يكشف سترَ الله عنه))

يعني ببساطة قاسية إن لو ربنا سترك ما تظيطش وتشنع نفسك أمام الناس؛ فما بالك بالجهر بقى والتفاخر والتبرير؟ يا نااااااس إنتوا مدركين يعني إيه كلنا معافيين إلا اللي بيجهر بالسوء؟ ده ذنب عظيم بيترتب عليه تمييع الحدود وفساد المجتمع!!!

إحنا مش بنحكم على حد؛ إنتي اللي طلبتي الناس تحكم عليكي عن طريق مجاهرتك وتبريرك للغلط، وما قررتيش تواجهي المجتمع بطريقة أخلاقية لأ حبيتي تظهري بمظهر البطلة المقاتلة ويا ريتها جت على كدة وبس، كمان بتزايدي علينا وعلى المجتمع!!

ربنا الحكم بيننا وبينك، ويجازيكي بما في نيتك وفي نوايانا ويهدينا ويهديكي.

المجتمع المسلم وتمييع الحدود ( الزنا ضد الشهرة )

صورة من البوست على الإنترنت

بكل تأكيد تابعنا جميعا هذا البوست وهذه الصور المنتشرة لفتاة مبتسمة وفرحة بنصر ما وطفل أو طفلة تكاد البراءة أن تأكل وجهه أو وجهها.

حسب ما هو جاء في القصة المزعومة أن هذه الفتاة "ذكر ما ضحك عليها وخلف منها وبعد ما حملت قرر إنه يسيبها وألا يعترف بالطفل"، وهي قررت تواجه المجتمع بهذه الابتسامة التي أصبحت الآن مستفزة وقد كانت ابتسامة نصر وفرح من قبل.

وقد علق صاحب/صاحبة البوست تجويديا من عنده (إن دي أول single mother وهييييييه يلا نسقف لها)، وأنا أرجح إن كاتب البوست هو بنت لأن هذه الصفة التلقيحية على المجتمع لا تأتي من بنت ترى أنها مضطهدة في مجتمع ذكوري بحت (وإن كانت معها بعض الحق)، وعلق صاحب البوست بإننا لازم ندعم هدير (المجني عليها) لأنها ما قتلتش الطفل وهتواجه المجتمع وهيييييه سقفولها.

طيب ببساطة شديدة جدا مين قال إن الطفل البرئ ده المفروض هي تقتله أو تموته عشان تعترف بغلطتها؟ ولا هو أي مبرر نبتكره وخلاص كدة؟ أصلا هي لو قتلته كان هيبقى عليها عقوبة في الدنيا والآخرة، دينا وقانونا؛ لأن ما ذنب الطفل في غلط غلطته هو والذكر التاني؟ الإجابة بدون تفكير إن مالوش ذنب، يبقى ده مبدأيا ليس مبرر.

ثانيا بقى فكرة إن حد يعمل حاجة غلط وهنا الغلط يا ناس ياللي بتفهموا غلط كبير، ده زنا والزنا كبيرة من الكبائر، واحد فلحوس مخه يجيبه يقول لأ ده مش زنا عشان هما قالوا إنها اتجوزت جواز عرفي؛ أقوله يا غبي ما تتكلمش وإنت تجهل اللي بتقوله؛ لأن الجواز العرفي في الشريعة الإسلامية زنا وهذا دليل صارخ من الصحيح:

عن عائشة رضي الله عنها قالت : قال رسول الله صلى الله عليه وسلم : " أيما امرأة نكحت بغير إذن وليها فنكاحها باطل فنكاحها باطل ، فنكاحها باطل ، فإن دخل بها فلها المهر بما استحل من فرجها ، فإن اشتجروا فالسلطان ولي من لا ولي له .

رواه الترمذي ( 1102 ) وأبو داود ( 2083 ) وابن ماجه ( 1879 ) .
وصححه الألباني في إرواء الغليل ( 1840 ) .

يبقى هذه البنت الآن غلطت زي ما الولد غلط برضة، وهي في حكم المجتمع والدين زانية ودي مش حاجة صح بعيدا عن كونها حرام؛ لما إحنا بقى نقعد نشجعها ونقولها إشطة إنتي كويسة عشان ما قتلتيش الطفل بعد ما جيبتيه بالحرام، ده هيدي مبرر لضعاف النفوس من البنات أولا بإنها تغلط عادي وهيتعمل منها بطلة بعد كدة ومن الولاد برضة لأنه لم يتم تسليط الضوء عليه كمذنب ومين هو وفينه وليه البنت ما فضحتهوش؟

ده نوع من أنواع تمييع الحدود، يا جماعة الخير الأديان بتحط الحدود عشان تقومنا، مش بأقول نرجمها ولا الكلام ده لكن على الأقل نعتبرها مذنبة وما نصنعش أبطال من بشر بيغلط زيينا!!

وسؤال لطيف ليه البنت الجميلة دي ما جابتش إسم الولد اللي عمل فيها كدة وشردته بدل تبرير إنها عملت الغلط بهذا الشكل؟ أظن الإجابة وصلت مخك خلاص.

عموما اللي بيساهم في نشر هذا العته دلوقتي بيشارك في تبرير الغلط وجعل ناس بتغلط أبطال وده بيؤدي ببساطة شديدة لأصحاب النفوس الضعيفة إنهم يفكروا بمبدأ: إيه ده طب ما قشطة أنا أعمل زيها وأبقى بطلة هييييييييه.

تم النشر من هاتفي الذكي. مصطفى سعدي.

عزيزي طالِب الثانوية العامّة اللي فرحان بنتيجتَك وناوي على هندسَة عين شمس.

عزيزي طالِب الثانوية العامّة اللي فرحان بنتيجتَك وناوي على هندسَة عين شمس.
-----

أولًا : ألف مبروك ليك يا حبيبي ,عُقبال التخرُج ‫#‏الحاجّة_ستايل‬

ثانيًا : بُص يا بيه .. أنا عايزّ أوضحلّك كام حاجَة كدة :

1. هندسة عين شمس مش أحسَن هندسة في العالَم ولا في مصر ولا في العباسية حتى .. كُل ده شو رخيص .. هتكتشف ده مِن أول أسبوع ليك في الكُلية .. وستبدأ في الاندماج مع النظام البيروقراطي الروتيني .

2. هندسة عين شمس مش هتخليك-عفوًا- "حُمار شُغل" عشان إنت هتشتغل بإديك جوّه .. آبسلوتلي .. هوَ إنت تقريبًا هتعمّل كدة نتيجة الضغط الذهني والعصبي اللي هتشوفه جوّه .. وكمية الشيتات والمعامِل والإثباتات , وده لو فهمته هتبقى فهمت يعني إيه براجماتية بس بالعكس .

3. لو فاكِر إنّك هتبقى التت النت وهتبقى نِجْم الكُلية وصُحاب وبتاع وكُل يوم في الكفيتيريا وبنات وكدة .. بقولّك إنسى من دلوقتي .. إنت مش هتلاقي وقت تشرب فيه بُق مياه أصلًا !! .. وحتى لو كُنت مش هتحضر مُحاضرات وكدة برده مافيش بنات والكافتيريا أقرب لأن تكون خرابَة مِن كافتيريا أصلًا ..

4. لو مُقتنِع اقتناع ولو بسيط إن كلمة "هندسة" اللي في "هندسة عين شمس" دي توحي بأي تطبيق عملي ؛ فأحب أقولّك إن الأمر مُختلف تمامًا بالنسبالنا .. وإن كلمة "هندسة" دي مُمكن تستبدلها بـ "تجارة" أو "آداب" أو "حقوق" .. لأن الحفظ واحِد والصَم واحد ..

5. لو إنت فاكٍر إن الفِهْم مُمكِن ينوب عن الحِفْظ زي ما مُمكن يحصل في ثانوية عامّة .. أحب أوضحلّك مثال بسيط :
كُليتنا الحفظ فيها كثير جدًا ؛ إلى أن طغا على أي وسيلة للإصلاح . ده مبدأ وقاعدة إحفظها .
طبعًا عارف الموبايل !! , الموبايل ده بيجي بذاكرة داخلية عشان تخزّن عليها بياناتك .. لو بياناتك دي عدّت الذاكرة المسموحة .. هتعرّف تدخل بيانات ثاني ؟! , لأ طبعًا .. ده حال طالب هندسة .. بس الفرق إن الموبايل ينفع تركبله كارت ميموري خارجي إنما طالب هندسة لأ ..

فيه فئة بقى بيبقى ربنا رازقهم بذاكرة كبيرة قوي كدة زي التليفونات اللي فيها ذاكري 32GB .. فبيقدر ياخُد كُل ما يدووه .. الفئة دي إسمها "الدحاحين" .. وهي فئة مُقربَة مِن سُلطة الدكاترة والمُعيدين ..

6. فيه لعنَة مشهورَة عندنا إسمها الورش دي حاجَة كدة زي مقابر الفراعنَة الداخل فيها مفقود وإسأل مجرّب .. فيه نُسخَة مُطورة شوية منها إسمها المعامل دي أقَل تعذيبًا شوية , ودي مِن أدوات القمع لدى النظام عندنا .

آخيرًا وليس آخرًا .. أنا مش بنفرّك من كُليتنا .. أنا بس بعمّل بمبدأ "أنا فهمتَك , وعقلك في راسك إعرف خلاصَك" , عشان لو اكتشفت الحاجات دي مع صدمات هتتبهدّل جوه السحل والسادية المُتبعة جوه الكُلية ..

ربنَا معاك , واللهم بلغت اللهُم ؛ فشهد .

إمضَاء ,,
طالِب اتسحّل جوّه الكُلية
ومبيقولش دي كُلية , مية مية

‫#‏هندسة_عين_شمس‬ , ‫#‏نتيجة_الثانوية‬ , ‫#‏اعترافات_ليلية‬ , ‫#‏وثائِق_غير_شرعية‬